Nacín nas Eiras, no concello do Páramo, onde dei os primeiros pasos e as primeiras palabras. Crieime en Quiroga, no Val do Sil, a miña terra de adopción e que segue sendo o meu paraíso.

Estudei o bacharelato en Monforte no instituto que hoxe leva o nome de Río Cabe. Son licenciada en Filoloxía Galego-Portuguesa e en Filoloxía Hispánica pola USC,  diplomada en Maxisterio pola Escola Universitaria de Formación do Profesorado de Lugo, e diplomada en Estudos Avanzados en Teoría da Literatura pola Universidade de Vigo.

Vivo en Ourense, onde exercín como Profesora de Lingua galega e literatura no IES As Lagoas. Fun tamén Profesora Asociada da Universidade de Vigo de Didáctica da Lingua e Literatura Galega e do Máster de Intervención Multidisciplinar na Diversidade en Contextos Educativos, na Facultade de Ciencias de Educación de Ourense.

Teño publicadas varias obras narrativas: As faces do diamante (Editorial Galaxia, 2023), Corte e confección (Editorial Galaxia, 2019), Unha verdade amarga (Editorial Galaxia, 2017), A boca do monte (Editorial Galaxia, 2016), Adeliña  (I Premio Pura e Dora Vázquez, 2004) e Rugando (IX Premio Pura e Dora Vázquez, 2012), e as obras de teatro  Unha estrela para Amina -(Premio de Teatro Infantil O Facho 2019-, Editorial Galaxia, 2010), Cataventos e cia (-II Premio Barriga verde, 2004- Baía edicións), Velaí vai o papaventos (2014) e O castelo de Pena Redonda (-Premio de Teatro Infantil O Facho 2016-, Edicións Fervenza 2018).

Son tamén autora da obra Voces da terra. Quiroga e os seus escritores (1995) do libro de pasatempos Restra de letras (Edicións Xerais, 2002) e de materiais didácticos para o estudo da lingua galega (Edit. Anaya).

Soño con seguir xogando coas palabras e tecendo historias e mundos de ficción.